Bakıda keçirilən İslam İnkişaf Bankı (İİB) Qrupunun illik iclasları çərçivəsində Azərbaycanda rəsmi səfərdə olan beynəlxalq nümayəndələr Məlhəm Beynəlxalq Hospitalı ziyarət ediblər. Ziyarətdə Ərəb-Afrika İnvestisiya və İnkişaf Mərkəzinin (CAAID) rəhbəri Amine Boutalbi və beynəlxalq satınalmalar üzrə ekspert Samira Benidir iştirak ediblər. Görüş zamanı qonaqlara hospitalın müasir tibbi infrastrukturu, qabaqcıl texnoloji təchizatı, eləcə də beynəlxalq standartlara uyğun göstərilən tibbi xidmətlər barədə ətraflı məlumat təqdim olunub. Nümayəndələr müəssisənin fəaliyyəti, tibbi imkanları və pasiyentlərə təqdim olunan xidmətlərlə yaxından tanış olublar. Daha sonra keçirilən rəsmi-işgüzar görüşdə tərəflər arasında gələcək əməkdaşlıq imkanları müzakirə edilib. Görüşdə qlobal tərəfdaşlıq əlaqələrinin genişləndirilməsi, beynəlxalq netvörkinq platformalarının formalaşdırılması və Azərbaycanda tibbi turizmin inkişafı istiqamətində birgə layihələrin həyata keçirilməsi perspektivləri ətrafında fikir mübadiləsi aparılıb.